لاتبجـــين

لاتبجين
عبراتج منايا ودمعتج سجين
وانا الكلبي بترافة وركة البربين
لا تبجين
وانت خدود عندج اترف من الماي
لو طاحت دمعتج تترك انياشين
لا تبجين
الي كلب ايتحمل نص عذاب الكون
ما يحمل دمعتج لو تلالي بعين
لاتبجين
ياعصفور جنه وشاه نص الليل
يالوعة ندامه وحسرة متيهين
لاتبجين
يالسيفج برائه وركبتي الجلاد
وهمومج حنينه وقسوتج عيدين
لاتبجين
انه بروحي اشتريتج مو بحال ومال
والكالج عذر مهما علي تجفين
لا تبجين لا تبجين
حبستج بالكلب كل عمري ذاك الراح
ومن يوم الطلعتي بلا كلب تدرين
ازق دمي بوريدج زقة العصفور
صار جناح عندج شجعج تنسين
جم طعنه احملتهه وكلت يالله إتطيب
وجروحي اتونس بيهن إتنبشين
ادمنت الام جي منج اعتز بيه
وأفتك بالجروح البيهن تلعبين
ناديتج مثل أيه بحلك مرعوب
ومثل نبته اشتهيتج لو جفاهه الطين
وتنطرتج مثل صايم يتاني هلال
ومثل فرحة يتامى بعيد ومعيدين
علميني بدمعتج ليش هسه اطيح
تبجين اعله حالج لو علي تبجين