خـــاااااايف !!

خايف)

خايف من أوصفك تشتهيك الناس
وخايف من أرسمك بالرسم مكدر

اذا منكر صفاتك ربك امسويك
موذنبي امن اوصفك وارتكب منكر

أسمر ماتصير أتحده شمس الصيف
من وجهك اخاف اعلا الشمس تسمر

وعلا المرمر انصحك لاتحط رجليك
تزلك يازبد وايوصخك المرمر

يبو ارموش الكصب دورة اعيونك هور
غررك بلام كلبي وبيهن اتحيير

براري بوجنتك واشفاهي تعشك صيد
زلفك طير شايه لو غزالة بر

مطعون بنظرتك كلبي شابع موت
كاغد كلبي صار وحاجبك خنجر

واذا رايدتجيني خيوط جيب اوياك
خرز سبحه اعلا جفك روحي تطشر

اهرامات اعلا صدرك يلشفاهك نيل
زهك فرعون خلكي وخاف يحدث شر

ياشجرة مواسم والفواكه بيك
عصفت ريح جفي وثمرك اتطشر

يبو امتون القمم شعرك صكر مجنون
ويبو اخدود الحماده وشوفي بيهن طر

طفل ثملان خصرك والعجيب البيه
ما اميز ركبتك لو هي منه أزغر

شامات الخلك لازم يصيرن سود
بس مثلك جذب ماشفنه شام أشكر

يافاو الحسن يلي بجبينك نار
وياحرب الترافه البيهه موت أحمر

ابنهر جاسم أجذبك مايموت الجيش
ابنهر صدرك يموت الجيش والعسكر