ارجو ان تعجبكم هذه الابيات الشعريه الي نميز بها الاصدقاء
ا
موكلمن فتحلك باب يهواك ولاكلمن يكرهك بابه ينسد
كو مسدود بابه وكلبه مفتوح واكو مفتوح بابه وكلبه اسود
اذا طشيت صحبانك ع الماي اذكلهم وفه الجواك يركد
واخففهم يضل طافح ع راك يروح وي الجزر ويرجعه المد
اذا محتار سافر تعرف الناس منو يزت القطار ويوكف ازيد
اكو تشده بحبل ويكطعه ويروح واكو بكلمة شرف ع سكه ينشد
واكو بمشية قطارك هو يحتار وبلحضه الاخيره وياك يصعد
واكو يشيل المحطه وي القطارات ويدكه علكبه وصدره ينسد
فرق بين اليعبدك بل محطات وفرق بين البنالك بكلبه معبد
موكلمن ضحكلك منه ترتاح تره ناب الضبع كل ضحكه ينحد
ولاتحقد على كلمن يبجيك اذا دمعك طفح صدكني تبرد
ولاتحقد على صعدو بله جناح معروف الصكر لوجنحه ينشد
او موكلمن نزل يسمه مذلول ولا كلمن صعد يسمه امجد
اكو صاعد رغم ماهو ع الكاع واكو نازل يضل لوقمه يصعد
اذا عندك جبل خلهم يصعدون فرق بين اصعد ولراد يصعد
اكو يهده الجبل لوهد الجفوف واكو يهد اجبل لوجفه ينهد
وعلى مبرد كفر تنغر السيوف لان سيف ع سيف بكلبه ينحد
واذا غيهم نحل كلهم يخسرون شنو نفع السيوف بغير مبرد
واذا تعزف لحن ويذمك انسان لاتكطع كمانك صعبه ينشد
مرات الحن مايطرب الناس ومرات البشر اذانات تنسد
ومرات الحن يطربله طرشان بس طبع اليسمعك زور يشهد
على البلبل يكلك منكر الصوت واذا ينهك حماره يكو غرد
واذا ضيمك كبر لاتحجب العين وتشوف الدنيه كله بلون اسود